စင်ကာပူ၏ နည်းပညာအဆင့်မြင့် စမတ် လမ်းမီးတိုင်များ
စင်ကာပူနိုင်ငံဟာ မြို့ပြစီမံခန့်ခွဲမှုကို ပိုမိုထိရောက်စေဖို့အတွက် သာမန်လမ်းမီးတိုင်တွေကို နည်းပညာပေါင်းစုံထည့်သွင်းထားတဲ့ “စမတ်မီးတိုင်” အဖြစ် ပြောင်းလဲလိုက်ပါပြီ။ ဒီမီးတိုင်တွေဟာ ရိုးရှင်းတဲ့အလင်းရောင်ပေးတဲ့ လုပ်ဆောင်ချက်အပြင် အခြားသော အရေးပါတဲ့ အခန်းကဏ္ဍတွေကနေပါ အကျိုးပြုနေပါတယ်။
ဒီမီးတိုင်တွေမှာ လုံခြုံရေးအတွက် CCTV၊ အများပြည်သူသုံး WiFi အခမဲ့ hotspot နဲ့ လေထုအရည်အသွေး တိုင်းတာတဲ့ sensor တွေ ပါဝင်ပါတယ်။ ဒါကြောင့် မြို့တွင်းမှာ လုံခြုံရေးကင်မရာတိုင်၊ WiFi တိုင် စသဖြင့် သီးခြားတိုင်တွေ အများကြီး မထားရှိတော့ဘဲ မြို့ရဲ့အမြင်အာရုံကို သပ်ရပ်လှပစေပါတယ်။
တစ်စုံတစ်ယောက် အကူအညီလိုအပ်တဲ့အခါ မီးတိုင်မှာပါဝင်တဲ့ အရေးပေါ်ခလုတ်ကို နှိပ်လိုက်ရုံနဲ့ သက်ဆိုင်ရာဌာနကို ချက်ချင်းအကြောင်းကြားပေးနိုင်ပါတယ်။
မီးတိုင်တွေမှာ တပ်ဆင်ထားတဲ့ sensor တွေက လေထုညစ်ညမ်းမှု၊ မီးခိုးမြူ တွေနဲ့ ယာဉ်အိတ်ဇောငွေ့တွေကို အချိန်နဲ့တစ်ပြေးညီ စောင့်ကြည့်ပေးနေပါတယ်။ ဒီလိုစောင့်ကြည့်ပေးနေတာကြောင့် အာဏာပိုင်တွေအနေနဲ့ ပြည်သူ့ကျန်းမာရေးဆိုင်ရာ ကိစ္စရပ်တွေကို လျင်မြန်စွာ အရေးယူဆောင်ရွက်နိုင်ပါတယ်။
ဒီလို စမတ်မီးတိုင် စီမံကိန်းကြောင့် စင်ကာပူဟာ မြို့ပြနေရာကို ချွေတာနိုင်ရုံသာမကဘဲ ပြုပြင်ထိန်းသိမ်းရေးစရိတ်တွေနဲ့ မြင်ကွင်းရှုပ်ထွေးမှုတွေကိုလည်း လျှော့ချနိုင်ခဲ့ပါတယ်။
