အမေရိကန်နိုင်ငံ ဖီလာဒဲလ်ဖီးယားဒေသတစ်ဝိုက်က အစိုးရကျောင်းတွေမှာ စာသင်ခန်းတွင်း နည်းပညာအသုံးပြုမှုကို စတင်တင်းကျပ်လိုက်ပြီး ကျောင်းသားတစ်ဦးချင်းစီကို စက်ပစ္စည်းပံ့ပိုးပေးတဲ့ အစီအစဉ်တွေကို လျှော့ချတာ သို့မဟုတ် လုံးဝရပ်ဆိုင်းတာတွေ ပြုလုပ်လာကြပါတယ်။ စာသင်ချိန်အတွင်း ဖုန်းနဲ့ ကွန်ပျူတာ မျက်နှာပြင်တွေကို စွဲလန်းကြည့်ရှုတာများလာမှုအပေါ် စိုးရိမ်ပူပန်မှုတွေ မြင့်တက်လာတာကြောင့် အခုလိုမျိုး အရေးယူဆောင်ရွက်လာကြတာ ဖြစ်ပါတယ်။
ဒီ ပြောင်းလဲမှုတွေမှာ ကျောင်းနယ်မြေအလိုက် ကန့်သတ်ချက် အမျိုးမျိုး ပါဝင်လာပါတယ်။ The Colonial School District နဲ့ The Tredyffrin/Easttown School District အစရှိတဲ့ ကျောင်းနယ်မြေတွေမှာ မူလတန်းနဲ့ သူငယ်တန်း ကလေးတွေကို iPad နဲ့ Tablet တွေ ပေးအပ်တာကို ရပ်ဆိုင်းလိုက်သလို စက်ပစ္စည်းတွေကိုလည်း အိမ်သို့ ယူဆောင်ခွင့် လုံးဝ မပြုတော့ပါဘူး။ Methacton School District မှာဆိုရင် သူငယ်တန်းနဲ့ ပထမတန်းကလေးတွေကို တစ်ဦးချင်း စက်ပစ္စည်းပေးမယ့်အစား Chromebook တွေကို စာသင်ခန်းအတွင်း စုပေါင်း မျှဝေသုံးစွဲတဲ့ စနစ်သို့ ပြောင်းလဲလိုက်ပါတယ်။
ဒါ့အပြင် Phoenixville Area School District က သူငယ်တန်းကနေ တတိယတန်းအထိ တစ်ဦးချင်း စက်ပစ္စည်းပေးတဲ့ စနစ်ကို ရပ်ဆိုင်းလိုက်သလို၊ Wallingford-Swarthmore မှာဆိုရင်လည်း မူလတန်းကလေးတွေအတွက် အွန်လိုင်း စာမေးပွဲစနစ်ကို လျှော့ချပြီး YouTube ရှာဖွေကြည့်ရှုမှုတွေကိုပါ စတင် ကန့်သတ်လိုက်ပြီ ဖြစ်ပါတယ်။ ဒီ အရေးယူဆောင်ရွက်ချက်တွေဟာ ကလေးသူငယ်တွေရဲ့ စာသင်ခန်းတွင်း အာရုံစူးစိုက်မှုကို ပြန်လည် မြှင့်တင်ပေးဖို့နဲ့ နည်းပညာ သုံးစွဲမှုကို နီးကပ်စွာ ထိန်းချုပ်နိုင်ဖို့အတွက် ရည်ရွယ် ပြုလုပ်တာဖြစ်ကြောင်း သတင်းတွေမှာ ဖော်ပြထားပါတယ်။
