ဖုန်းအားတစ်ခါသွင်းရုံနဲ့ ရက်ပေါင်းများစွာ အသုံးခံမယ့် Samsung ရဲ့ အနာဂတ်ဘက်ထရီများ

ဖုန်းအားတစ်ခါသွင်းရုံနဲ့ ရက်ပေါင်းများစွာ အသုံးခံမယ့် Samsung ရဲ့ အနာဂတ်ဘက်ထရီများ
Samsung SDI ကနေ အခုလက်ရှိ စမ်းသပ်နေတဲ့ နည်းပညာသစ်ဟာ ဖုန်းနဲ့ Tablet တွေရဲ့ ဘက်ထရီသက်တမ်းကို အဆမတန် မြှင့်တင်ပေးနိုင်ဖို့ ရည်ရွယ်ထားတာပါ။ ထူးခြားချက်ကတော့ ဘက်ထရီပမာဏကို အကြီးစား (12,000mAh ကနေ 20,000mAh အထိ) ထည့်သွင်းပေးမှာ ဖြစ်ပေမဲ့ ကိုယ်ထည်ပိုင်းကိုတော့ ပိုမိုပါးလွှာအောင် ဖန်တီးပေးသွားမှာ ဖြစ်ပါတယ်။

ဒါပေမဲ့ ဒီလိုကြီးမားတဲ့ ပမာဏကို ပါးလွှာတဲ့ဒီဇိုင်းနဲ့ ပေါင်းစပ်ဖို့ ကြိုးစားတဲ့နေရာမှာတော့ စိန်ခေါ်မှုတချို့ ရှိနေပါသေးတယ်။ လတ်တလော စမ်းသပ်မှုတွေအရ ဘက်ထရီရဲ့ သက်တမ်း (Lifespan) ပိုင်းမှာ Apple ရဲ့ စံနှုန်းတွေနဲ့ယှဉ်ရင် အဆင့်မြှင့်တင်ဖို့ လိုအပ်ချက်တွေ ရှိနေဆဲ ဖြစ်ပါတယ်။ Samsung အနေနဲ့ ဒီဘက်ထရီတွေဟာ အားသွင်းအကြိမ်ရေ ထောင်နဲ့ချီပြီး စွမ်းဆောင်ရည် မကျဘဲ ခိုင်ခံ့နေစေဖို့အတွက် အပြင်းအထန် ဆက်လက် ပြုပြင်မွမ်းမံနေရဆဲ အဆင့်မှာပဲ ရှိပါသေးတယ်။

တကယ်လို့သာ ဒီနည်းပညာ အောင်မြင်သွားမယ်ဆိုရင်တော့ အနာဂတ်မှာ ကျွန်တော်တို့တွေ ဖုန်းအားသွင်းဖို့အတွက် Power Bank တွေ သယ်စရာမလိုတော့ဘဲ တစ်ခါအားသွင်းထားရုံနဲ့ ရက်အတော်ကြာ စိတ်ချလက်ချ သုံးနိုင်တော့မယ့် အခြေအနေကို ရောက်ရှိလာမှာပါ။ နည်းပညာနဲ့ ဒီဇိုင်းပိုင်းကို အကောင်းဆုံးဖြစ်အောင် ညှိနှိုင်းနေရတဲ့ Samsung ရဲ့ ဒီခရီးစဉ်ကတော့ တကယ့်ကို စောင့်ကြည့်ချင်စရာပါပဲ။